إجمالي مرات مشاهدة الصفحة

14 فبراير، 2012

ديوان انثي تقر

انثى تقــــر
أيتها الحمقاء اقري بربك قد اقر لكي الفتى  
قولى بربك ان حبكى داخلى قد ازيل فاأنتهى
او قد يكون القلب منفطرا وينثر ما تبقى من الندى
لا لاتقرى حبيبتي إن المقر قد يساق الى الردى
لا لا تقرى باثمك الملعون من سبع ومن  اثنين من كل المدى
اثمك الملعون توج قبلك مثله مثل الملوك تجردا
قد تكررفي السهول وفى الحقول قد صار افضل مشهدا
ترا من يحب حبيبه هو صادق لافرق فى الحب من يوم اوغدا
اذا احب فا ول الحب ولاء وقسم على مدى الدهر والابدا
لا افتراق فكما الحياة قد جمعت بالموت ايضا نخلدا
هذا لقبلك فكما اعتديت ستكون ايضا معتدا
قد تكون علما بين العاشقين  جميعهم قد تكون المرشدا
قد يضحك الباكون يوما حين تصبح مقعدا
قد تضحك الحمقاء قد تخفى معالم حبك المتجردا




المحب الاول
يا الخدودك وردة  يا الدموعك ذاد
 تسقى كل العطشي تروي كل فؤاد
 والمحب الاول لو عاش في يوم هو حداد
يبقى ضيع عمرو لو قضاه سهاد
ماهوزول بستاهل الزويل الجاد
الزمن دار بيهو ماتم ليهو مراد
لا النحيب هو برجع من نفسو لو ماعاد
لا النصيب بتحمل يضيع في يومو يباد
ديمه القدر متحكم مابنسي اصلو ميعاد
كل الخطاوى الماشه محسوبه بي عداد
والاتقسم ماهو بزيد لو دقوا فيهو مزاد
والقسمه مابتتحمل تعيش حزن واعياد
الزارعو بدرى وخضر اصبح كساد في كساد
حرقتو انت بايدك قبال تدوسلو زناد
انس الحصل واتصبر سيب نارو يبقى رماد
والجاي اصبرليهويا ريتولو ماعاد


يادنيا ياظالمه
ياروح كفاك عذاب لزول صبح مرتاب
لاقدر عذاب الروح راح ولّي منك غاب
سابك براك وحيد في ليل طويل اومديد
فاتك وساب الريد في ليلو بين الغاب
ساب للعيون تزرف ومن الدموع تغرف
لا ساب هو ليها حرف لا عرفت الاسباب
يادنيا يا ظالمه لي زوله مو حالمه
مسكينه ما عالمه ليها القدر كيف صاب
ضاعت هي احلاما وسنينا واياما
وين ترمى تانى ملاما
والزول ذوب بدرى وذاب
ياربى ياستار خفف من الاقدار
اصلو الزويل قدار ما قدر الاحباب





يوم جارو الحبايب
يوم جارو الحبايب   جارو وقالوا انسى
سيب درب المصايب   سيب الريد وارسى
الحب ذى كتائب    يغير يوماتي يقسى
لاقادة لانائب    بس كيفن هو يرسى
ياالجايرين  علينا كيف ننسى الحبايب
ننسى الريد هو فينا  وكيف نصبح قرايب
لا قادرين نسافر    او نرحل نسيبو
الناهى والآمر    قدرو يكون حبيبو
ينهى ومره يأمر في زول ماهو قادر
يظهر ومره يندر ومرات يبقى غادر
والحب جد مراحل   في فصولو وايامو
والحب مابجامل    لو كتبت اقلامو






بحار النفاق
وفى بحر النفاق اوجدنا الهوى
وفي بحار الهوى امتطيناهو النفاقا
قد يلبى البعض رغبات الهوى
فيسلك من لب رغباته سبل الفراق
ليهوي غيره ويمطر من هواهو
بوابل فيمضي لحاله دون الرفاقا
او يستمد من النفاق بقوة
 ويبعثر الكلمات في بحر من الاشواقا
فيصير ريح الطغاة رياح
 فتملى رماح الرماة للافاق
قد يبدو لنا النصر على الافاق
وكيف ينتصر الهوى من دون اثم او نفاقا
فيا من هوى قلبه ببحر من هوى غيره
لا تكترث فبحر الهوى في الغير دفاقا
لابارك الله فيك وانت غريق ببحر
لاضفاف يحده وغيرك قد راقه ماراقا
فغرقت بساحل منه بعد ان دنا منك
واخرجت الروح منك من غير اشفاقا
فما يعاب العبد من بؤس الم به
ولا يعاب السيدمن بطشه ونفاقا
فلابد من يوما لياتي با خرا
فلا يسأل المرء عن ما الم به من بؤس وارهاقا
اذا ما ولت الايام واضحت غبارها رياحا
وبعد رياحها سيقت مساقا
 الى احدى الديار التي ليس بها ونيسا
واطبقت كل ما بالارض اطباقا
فكل امرئ مهما طال به الامد
 لابد من يوم ليسقى مزاقا
في يوما سينشق فيه القمر
 وتخشى الشمس من الظهور والاشراقا







ليل السواد
انشاء الله يوم تلقي المراد ماتعيشي ابدا يوم حداد
انشاء الله يوم تنسي الحصل تبقيلوا زاد
لاخاف هو من طول السهر لا خاف هو من طول العناد
طول عمرو عايش في سكر بنظرة غاص في سكرو زاد
لاشال هو في يوم هم مهر لا يوم خسر جرس المزاد
مسكين هو من وقع البصر في يوم تعيس ليل السواد
ياريتو لو ماشاف قمر لالبت اقدارو المراد
يكفيه لحظه من السنين ندمان على الخوف من حنين
بلمسه فقدت زاد ا لين في ليله عاشت في انين
خايف عليها من السنين خايف عليها من الحنين
بالفيها تصبح يوم تلين في سكة الريد والضنين
كل الخلق خايفالي اصبح يوم عليل
وانا جد بخاف لو يوم هي فقدت للدليل
وانا عارفو مشوارك طويل والعمر الباقي اصبح جد قليل
والشافعه ما شافعه نصاح والخلق ماعدد ابدا للمثيل
تحسب تعد ترعى النجوم هي وحيده في ليلا الطويل


انا ما عشقتك
انا ماعشقتك في الليالى المظلمة
 ذى كل عشاق العرب
وانا ما كرهتك لا مبالى
 من شراين ساقيه لقلب اتخرب
اصبحت عاشق لليالى المظلمة
 راجى الخيال لو جانى من ارض او سما
راجيهو يظهر زي برق
 راجيهو يوصل يتحرق
 جواى اويغرق غرق
حتى الخيال يا ظالمة انتي مرسلا
 لحته ما بتتخيلا
سايبه الجنان الفي العلا
 النازله ليكي مدللا
مرميه في وسط البلا
راجيه النعيم من الخلا
لو في الجمال جد انتي ليهو مكملا
 بس ايه كسبتي من الجمال غير الجلا
لو فاكره قلة تجربه ممكن تقلل للعتاب
كل الحصل في يوم يروح من غير حساب
من الضمير الفيكي لو فضل يعيش او يفوت يصبح سراب
انتظري يا بت البلد قارب ضميرك ينهمر من السحاب
يرجع يسيب لى غربتو بعد ما طول وغاب
خليكي فاكره للحصل خليكي منتظره المصاب
والعاش سنينو قبيل عذاب راجى العذاب
في يوم هو يتلاشى ويذاب
صحيان ضميرك ما بيفيدك ما الزمان فات شال سنينك
والعذاب العشنا فيه كنا عايشين بى وريدك
إلا وكتين سابنا نعطش وقطع الصله زول بريدك
وسبتي للماضي القبيل ونحن سبنا خلاص بريدك








العيون الديمه باكيه
العيون الديمه باكيه لاها نايمه ولاها صاحيه
والعقول الفيكي هايمه والقلوب البيكي ساميه
لاها قادره علي فراقك ولاها قادره على بكايا
لابتصبر يوم عليكي والعيون زارفات دمايا
مهما ترحل او تسافر نحن بنعدى المخاطر
مهما تبعد ياحبيبنا نحن ابدا مابنكابر
لابننسى زكرى حلوه ولابنخشاها المصائر
مع نجوم الليل نساهر في حسابات مالا اخر
نحن راضين بقدرنا حتي لو جانا وجبرنا
نزرف الدمعات نكابر حتي لوحدد اجلنا
والعيون لو جات هي مره زارفه بتزيد فى سهرنا
ديمه نشقي اونعاتب لزويل كمل صبرنا






الدمعه مابتعين
الدمعه مابتعين بتزيد هي في الالام
لما الفراق هو يحين ويشيل هو للاحلام
ما الدنيا مابترحم غداره بتزيد هم
من القدر مابنسلم ننهى الدموع بي دم
الدمعه مابتفيد لو في الغرام والريد
في ظالمه ليه بتزيد في زول هواه عنيد
اصلو الحبيب غدار كمل هو للمشوار
من غير سبب احتار كتر هو فى الاعذار
خفف دموع العين واصبح مصاب بعين
لزولو ماهو بعين عايز فراقو يحين
كمل هو فينا صبر دا الحبُ كلو جبر
ما الريده مالا عذر لوباقي فينا عمر
ما الزول هو جد مسحوروانا بيهو جد مسرور
بحبي جد مجبور واصبح هو ما ميسور




الجواى اتكتــــح
اناالجواى اتكتح فور هو لى دمي
لامن فاض اتكتح فد نظره بيها انجرح
قوليلا ام خدود لفحتي الفحي الطرح
خلق الله جت لا واحد انجرح
لاخاتين عشم في الزول اليوم ماسرح
لاشالت هي يوم هم زولا بيها انجرح
لاختت عشم في الكم الما برح
كل الدونا صي لازول بيهن نتح
لاعد اللفيهن من محاسن او قبح
ما النيل فاض طفح غرقت الجروف
ماساب رمال او بلح
ماالنيل فاض طفح لاساب للخلق
لافد زويلا برح كل خلق الله انطرح
في شافعي ماها من النصاح لو زارا مجنون اتنصح
واصبح مريض بيها اتلفح افضلو كان مرضو القبيل
يمكن هوكان يوم اتصلح قبال يزيد جرحو القرح
واصلو ما حمل العذاب طول عمرو ماسي وما صبح
ياريتني كت جنيت قبيل فد يوم اعيشو مرح
اصبحت جد معتوه والفيني بدري انجرح

شقيش يا ام وجــــــــن
شقيش يا ام وجن ايه الحصل في الليل
 رسلتي الخيال بشده ذى السيل
طول النهار يكفي الا عذاب الليل
اصبح علي كتير  واصبح يهد الحيل
وانا كنت راجى الريد يبقالي  يوم العيد
الا المراسيل ديل جد زادو فيني الريد
وانا كنت راجيكي بس جد خيالك كان
 اسرع من الحاضر اصبح معاي ذى هم
يوماتي زايد غم وانا مامقصر فيه
بس زاد هو فيني عشم
ماداري للحاصل لو راجي يستولى
 على قلبك الفيني
قوليلو مابتقدر قوليلوما يجيني
لافي النهارلا الليل قوليلو مابتقدر
 تشري القلب مني
والغيرو كان اشطر قوليلو مابتقدر
 لايوم عليه جرس ادق واتسعر
 لاقبلو زول هو صبر
قوليلو يا الغادر
 زولك اكيد صابر
 لانو مالاقي في الاصل متباكي
لاصلك المريود فات جد صبح معدود
 فات في زمن مسدود
يصبح هو من الكان
والماضي ولى زمان
 يمكن هو يرجع ليك
إلا الحصل والكان
الزول هو عايش الريد 
يا زوله اوعي الريد
 الجاني بالساهل يمكن يفوت منك
في لحظه تندهي لى تلقيه ماحاضر
اصبح خلاص ماضي وتعيشي في الايام
لاقادره تصبري يوم
لاقادره تلقي الزول والزول هو فات الريد
تتباكي طول الليل مسكينه  فاقده دليل
لاعارفه ترجعي كيف ملهوفه تلقي القيف
لاخايفه حد السيف لاخايفه حر الصيف
نار الله جواكي خالكي تتباكي
 في ساحل الايام
يوماتي رافعه تمام
اصبحت والخدام ترعو اباليس زول
 ما لاقي ليهو مقام
الا الصبر كملتي من بدري في اعوام


ارتاح خلاص
ارجوك بس منك سماح ملت عويناتي النواح
خاليني في غابات سباع ذى طير وحيد من غير جناح
رابطني ليه قاعد بعيد ارجوك بس فك الســراح
فك العقال خليني بس اطلع براى من المراح
ارتاح خلاص خلى الدموع منك تسيل
خلى الدموع اطلق سراحات العويل
ليه كاتم العبرات عليك جابر عويناتك تشيل
عارف براك شيل الدموع بالحيل تقيل
ارتاح خلاص سيب الزعل اصلو الزعل ماهو بفيد
ارتاح خلاص سيب القديم ابداه للدرب الجديد
انسى الماضي واحزانو والمؤثر فيك شديد
انسى العمير الفات و القاسيتو بالتحديد
واتعلم من الزكرى وما تنساه ظلم الريد
واتعلم من الايام واتعلم من الترديد



ضياع
ياخبر لامن هو جالى انا كنت في نص الليالى
الخبر ياخوى خلاص عشعش كتير انا في دواخلى
يوم ماشفتو معاها ماشي اصبحت بيها انا ما مبالى
ضاعت ايامنا الجميله وضاعت ايامنا الخوالى
اظلمت دنياي مره والعمر من غير مسره
غورتها وغارت خلاص مرقت زمان من جوه بره
الباعت الريده القديمه ما اظنُ  تصونو ديمه
فاكره نفسها في السليمة ياريت اشوف فيها الاليمه
العمر فات ما مؤمل والزمن ليه ما يكمل
خلا وداعو اليرمل في السنين الما بتهمل
والعمر لو فيه باقي ماظنى ارضي انا بالبواقي
والزمن لو جابلى ساقى الزكرى بتدور ذى سواقى






زمن المحن
خلتني في الحال العلى هجت ورحلت من زمن
خلتني رحلت لى بعيد خلتني في نص الزمن
زمن الضياع زمن الرياح العاتيه لى زمن المحن
خلتني محتار براى من قبل ما امسك ثمن
ليه سبتي يانايرة الخدود الزول دا حبو بلا حدود
يتزكر الاوجاع براه ويزيد فى الآمو الصدود
اصلو الصدود منك كتير ياريتنى الحق بالجدود
يتوسد من فوقى التراب اتوسدو يصبح ودود
برسل سلام عبر الزمن بس كان سلام من غير ردود
والرسائل يومي جايه  جايه ماليه الكون جحود
سايباني في نص الزمن لا قادر ارحل او اعود
والطالبو منك ماكتير ياريت تسيبيه الوعود







القطر السريع
القطر السريع لا يوصلك ولاليك يوصلنى
وانشاء ماتلقى المراد انا بى مرادك بعتنى
خايف تجن او تنتهى قبل النهايه المشتهى
عايز اعزب لقليبك يا ريت هو في يوم يتهرى
داير اقول واحكى ليكى اصل الحكايه من البدايه
في يوم من ايام الربيع بدت الحكايه
 بدت في اخر ليالى الصيف
قبال امطار الخريف الجايه
تهطل بغزاره شديده ترفع رايه
مليانه ترفرف للبنيه الجايه
تلوح للوليد البلعب تقولو اقيف
يقيف ببراءة الاطفال
 يعاين في بنيه تنادي
مبلله بمطرا رزاز هطال
وشيشه قمر خدوده ثمار
عيونه نبال تنشن في قليب الزول
تملى الزول كلو وبال
 تجبرو عشان يغوص جواها
 يغرق جوه في الاوحال

ياويح قلبى
يا ويح قلبك من جمودك اسطلى
يا ويح عشقى ماله بكى ابتلى
يا ويح عقلى والذى بخيالك قد اختلى
اعلمى انى نزيل فوق عرشك اعتلى
فهل لى ان اعلو كل صبح قابلا
وترضى نفسك بان اكون بك متذللا
فوالذى انزل الفرقان وفلق الحب والنوى
ومنزل اللذات من حب وعشق وهوى
ان عشقك داخلى قد استوى
هذا كتابك داخلى قد انطوى
قد مال قلبى نحوك حتى هوى
فتطايرت منه الدماء وقلبى منه ارتوى
ماذا تريدى ان اكون عبدا وتكوني انت السيده
ام تريدين ان اصبح راهبا وتكوني انت المعبدا
ايتها الصايده قد ظننت انى اول مصيده
نسجت شباكك حوله من قبل اخذ الموعدا


لحن المــــوج
تعزف عيني لحن الموج
 فيعزف قلبى لحن البركان
يتراقص خدى يرتعد جسد الاموات
يطرب البركان اشتاق انا المسكين الى النيران
انسى الاحياء واشتاق لكل الاموات
عنى ينشغل الاموات بنعيم تشخص للابصار
والفرق الشاسع بين الماء وبين النار
قد ضعت انا وحدى بينهما وسط التيار
قد ضاعت مني قبل الهمس قدضاعت مني قبل اللمس
ماعدت اسأل عن الغد حتما سيكون كما كان الامس
فما زلت اكتم للاسرار ومازلت اغوص في الانهار







قالوا ارتحــل
لا الجروف الفيها بتشبه لجروفنا ولا شواطيها بتشبه لي شواطينا
لاصباحتها وامسياتا بتشبه لصباحتنا واماسينا
ما خلاص فتنا ارتحلنا ضاعت احلامنا وامانينا
لا الطنابير والطبالى الفيها بتعزف اغنيه من اغانينا
ليه البعاد ليه العذاب والعيشه احلى مع الصحاب
قالوا ارتحل ودع بعد ودع قبيل سكن السراب
خلى الفريق حزنان عليه سالن دموعو من السحاب
حتى القمارى ابت تغنى اشتدت اصوات الغراب
قالت خلاص زولكم رحل ياريتو كان من بدرى فات
سالت دموع اهل البلاد جداول تسقي لكل الجهات
هج ارتحل حتى السحاب ومن الجروف كل الصبايا والبنات
حتى السواقى ابت تدور ابت ترتل القمارى الصادحات






فرح الوجــــــــع
قولي يا فرح الوجع قولي كيف هو المستحيل
لو قلب في يوم اتوجع واصبح هو بالريد جد عليل
قولي قبال ما اقول قولي وين القى الحلول
قبال ازيد فيك الزهول امطر وازيد فيك الهطول
قولي ياتعب السنين قولي وين القى الحنين
عارف القدر لى مابعين شكلو الفراق قارب يحين
مشتاق اخاصمك وانتهى لو بي فراق بيه اتلهى
اسرع وازيد انا في المشى ابعد وليك انا مشتهى
اسيب عيوني الجات بتبكى والقلوب الجات بتشكى
من حبيبا ماهو قدر فات وساب هو زمانو يحكى








مهما تقسى
انت مهما قسيت علينا مهما جرت براك علينا
مهما تقسى يا حبيبنا نحن راضين بي مصيرنا
كل ما تقسى تزيد قساوتك كل ما تقسا تزيد غلاوتك
القليب دايما براودك وانت زايد في نداوتك
ديمه زايد في ظنونك وماك عارف للبخونك
مانى قادر اعيش بدونك ربي يغفر ليك يصونك
وانت رامي اللوم علينا وماك فاكر في سنينا
واللضاعت بين ايدينا ونحن منتظرين تجينا
والعيون صبحت تعاين لى زويلا ماهو باين
في زويل اصبح هو هاين في الرحل عدى المدائن
ونحن منتظرين نشوفوا بين رمالو وبين جروفوا
لو لمحنا في يوم وقوفو ذى قبيل مابين صفوفوا
بس هو حالف لقدرنا جانا بقدرو وجبرنا
بي فراقوا اليوم امرنا في الجروف ودر سمرنا
ما الفراق مكتوب علينا والقدر حدد مصيرنا
شال عمرنا وشال سنينا بدري قسم لي نصيبنا


غريب الديار
يا حبيبا عزيزاغريب الديار
لاتجافي حبيبا يعاود في الجوار
لاتجافي حبيبا  وتهمل مسار
لاتجافي تباعد ليوم المزار
قد تلاطمت امواجه وصارت تلال
صار لايخفى عليك التيه والدلال
انه الحب يوما بى طعم الزلال
فيوم حرام ويوما حلال
ياحبيبا تناجى ونادي الرفيق
في غياهب جب اضاع الطريق
في سراب محب يكاد الغريق
 خروجا فيهوى الي مكان سحيق
ومن حوله اشباح الضباب
 وبين يديه تلوح الذئاب
وفي ظلمة نحس اتاه الغراب
 ولب ندءا اقر المصاب


جر في السبح
شوف يالفكى دايرلي بخره قويه
تزيل الالم من فوقي كل المعشعش فيا
اقرالي سورة المانعه اوصل لحد الميه
قبال اصير معتوه يكربني حبلا فيا
جر في السبح يا الشيخ وامسك عدد بالنيه
اصبحت جد مقتول بى شافعه لسه صبيه
جر في السبح يا الشيخ واقرالي ياسين
عساه يشفى هو روح سابح مع الوزين
لو بس تهدى قليل واصبح  من الهادين
جر في السبح ياالشيخ ينتم نص الدين
او بس يصل للبر طليق او لسه سجين
جر في السبح ياالشيخ لي زول وحيد مسكين






سطر مكتوب
اصلو الرحيل اصبح هو مكتوب
 كان في صباح او في غروب
واصلو المصير  ماهو محبوب
 قفل هو لكل الدروب
واصلو القدر بدرى اتكتب
على زول مسيكين جد هو مغلوب
ماهو الزويل المستقر
 كيف يستقرفوق سطرو مكتوب
لاخايف اصلو هو من زمن
 من ريده غرقانه في محن
من بدرى حبوهو اتمكن
 والريده بخست الثمن
زول عمرو اصبح كلو ريد
كيفن يعيش في يوم سعيد
 زول ريدتو في زولا بريد
سهران صبح في ليل وحيد


سهران اناجى

الزول القليبو جريح فات رحل سكن الضريح
الباب البجيب الريح ياريت تسدو وتستريح
ليه الناس تعيش في جراح ليه ما يعيشو في افراح
حليل الزول هو من يوم راح ومن يوم كتر النواح
زولا جد صبح نباح لا في مسا ولا في صباح
خلاص اصبحت بين نيران قلب اصبح هو ذى بركان
طول الليل بين اوحال وبين خيران يمين اصبحت جد حيران
بالشافعه الهى ما انسان يمين الشافعه شافعه جان
ديمه اصحا وديمه اسهر كيف انوم يوماتي اقدر
الزمان فات بينا ودر لخطاوى الشوق هو عتر
الحلم ليه ماهو عبر في الامل اللينا خضر
والسهم لي رمالنا فاجي بيه السمح الليله هاجي
طول الليل سهران اناجى ولي خيالا ديمه راجى




امانه عليك
بس امانه عليك يا اب شنب البنيه دى ضاقت بالادب
مافي مرقه من غير سبب البنيه الاحلى من العنب
مافي زولا رسل او كتب اصلو ما شافوه اللهب
ما الدموع المنها انسكب ومافي زولا عارف السبب
البنيه بي لونا لون دهب ما خلاص فات لونا انشحب
القليب الفيها اترهب مله الحياه ملى التعب
والجسيم الفيها اتصلب نار هواها كيفن غلب
خاتى بالك بس في الدهب والبدق بابك معيب
ماك عارف الواهب وهب للقروش كيفن هوبسحب
قبال زيارتك ليها في جوه القبب الساعه ديك مابتنفعك ابدا خطب








غداره
اخير لك يا قلب تبعد خالص وتخطاهو وتسافر
وتنسي البينك وبينو اوعك لا تخاطر
اتقبل النازلات وارضي بالمصائر
اصلو الزمن فراق اصلو الزمن غدار وجائر
كل ما تقول قربت ليه تلقي الحبيب منك هو نافر
انا قلت ليك انسي الحبيب اصلو الحبيب بقي ليك ناكر
باعك يا قليبي زمان كمان باع الضمائر
روح خلاص منك بعد قرب هناك من المظاهر
فك الحبال المن زمان مربوطه بانبل مشاعر
وعاش مع زولاً خلاص بدل حبالك بالجواهر
انسي الزول خلاص اوعاك لا تساهر
زي ما قبيل هو باعك بيعو و بيهو غامر













ليمون الجناين
دايرك بس تجينا تريحى الفينا
ياحلوه يا زينه ماتقطعى البينا
ليمون الجناين شوقك فينا باين
ماقادر اعاين لا قادر ابقى خائن
قاعد في طريقك لو بس يوم اعيقك
واسكن في فريقك وانهل من وريدك
ياحليلا ايامنا زولنا الفات نسانا
سابنا هو لى عذابنا ماراعى الامانه
وانا قاسيت بحبي بس يغفرلو ربى
الساكن في قلبى وما عايز يلبى




السمحه النديه
حليلنا حليل منانا حليل زمنا وايامنا
 يوم البريدو جانارحلنا وسبنا دارنا
 ساب الفريق سابنا لما فكر في سوانا
رساله عليك امانه توصلو للازانا
 مابنسيب هوانالو دقو جبخانه
 السمحه النديه زايده فيني ازيه
رافضه ليه الجيه الكاويه قليبي كيه
بنيه هاديه ورضيه خدوده نايره ورديه
بعاده سمو سم حيه يلدق يزيد البيه
في الحلوه النديه اموت وادفع الديه
بسم الله سموها بى حبى خبروها
امشو ليها زوروها لالفاتحه اقروها
ياريت تراضوها بحبى هنوها
الله ياذى الاذوها




شايلنا سيل
شايلنا سيل شايلو الهبوب فاض بينا فات بينا الدروب
لون القمر اصبح شحوب ضوء الشمس سكن الغروب
سيلا هو كان بالحيل شديد يجرف زوى الراى السديد
يومو اللكان الدنيا عيد يومو اللكان الليل مديد
شال مننا في ليل سعيد احلام صبانا معاها صيد
ما خلى فينا زولا بريد شال روحى سابني براى وحيد
انا ايش عملته وشن جنيت ماذي  ذي كل العبيد
بحلم بكل ايام صباي تصبح معاها احلامى عيد










يومو الرحل
قالوا طول ما رسل سأل ورونا بس ايه العمل
الوليد من يومو الرحل بيها ما رسل ولااتصل
ياحليلا من رحل الولد ساب فريقا وساب البلد
وكل جيش الحله احتشد خلاها تبكى من الكمد
مره تنسى للزول الهجر مره تضحك مره تزيد في الكدر
مره تنعس ومره تعيش في سهر ماها راضيه ابدا بالقدر
والزمن بهدل حويلا والدموع تنزل هميله
ما خلاص سابت مقيله بالهزل صبحت عليله
تانى بس لي وين تقبل ما الوليد ماهو البرسل
والصبر ماهو البجمل والقدر حالف يرحل
يلا اكتبى في الوصيه يلا زيدى الزول ازيه
زيدى في الهم يا النديه يلا ارحلي يا بنيه
الشاعرقريب الله محمد حسين